MANCHESTER UNITED ITAMSAJIRI JAMES RODRIGUEZ???

Upo uwezekano kwa klabu ya Manchester United kurudia nia yake ya kutaka kumsajili winga machachari, kipaji halisi cha soka kutoka nchini Colombia anakipiga FC Porto ya Ureno James Rodriguez. Inavyoonekana Man United inaweza ikafanikiwa kupata huduma ya mchezaji huyu endapo tu itakubali kubadilishana moja ya wachezaji wao ghali...anaweza akawa Anderson au Antonio Valencia.

Rodriguez mwenye miaka 21 tu hivi sasa, amekuwa kwenye mawindo ya Sir Alex Ferguson kwa mda mrefu sasa tangu kipindi cha dirisha kubwa la usajili barani Ulaya katikati ya mwaka uliopita wa 2012. Man United ilipeleka ofa FC Porto lakini kwa bahati mbaya ilikataliwa. FC Porto walihitaji £36m, pesa ambayo ilikuwa ngumu kidogo United kukubali kuitoa.

Hata hivyo, kumekuwa na taarifa kutoka vyanzo mbalimbali nchini Uingereza kuwa kiungo Anderson angependa kurudi kwenye klabu yake ya zamani (FC Porto) kitu ambacho binafsi ninahisi kitasaidia kufanikisha lengo la United kumnasa Rodriguez.

Anderson amejikuta akiwa kwenye wakati mgumu ndani ya Manchester United kutokana na kushindwa kurudia fomu yake tangu apatwe na tatizo la kuandamwa na majeruhi na amekuwa akikabiliwa na upinzani wa hali ya juu kupata nafasi kwenye kikosi cha kwanza kutoka kwa kina Michael Carrick na kinda Tom Cleverley jambo ambalo linachochea hamu yake ya kutafuta timu nyingine atakayoichezea michezo mingi ili mwisho wa siku aitwe kwenye kikosi cha timu yake ya taifa ya Brazil kitakachocheza fainali za kombe la Dunia mwakani.

Pia kwa mujibu wa taarifa mbalimbali, ni wazi kwamba Manchester United inataka kuondokana na mchezaji huyo ambae kimsingi mtu anaweza kumuita 'injury prone player' yani mchezaji anaesumbuliwa na majeruhi ya mara kwa mara. United inataka kumrejesha Anderson FC Porto ili kuwe na urahisi fulani wa kumpata Rodriguez.

Na jambo lingine la kufurahisha ni kwamba msaka vipaji wa Man Utd Martin Ferguson ameki-scout kipaji hiki mara 7 msimu huu. Inaonekana sasa ni wazi kwamba Sir Alex Ferguson atawapa FC Porto Anderson na atatuma ofa mpya ya kutaka kumnasa Rodriguez.

James Rodriguez ameanza michezo 11 msimu huu na amefunga mabao 8 kwenye ligi kuu ya Ureno, na kama atajiunga na wababe hao wa soka la Uingereza itamaanisha atakuwa amejiunga na washambuliaji wa kiwango cha Dunia (World Class Players) Wayne Rooney na Robin van Persie kwenye safu ya ushambuliaji ya Manchester United...Rodriguez anasemwa kuwa bidhaa muhimu sana ambayo soka la Ulaya na Dunia kwa ujumla inajivunia nae.

Safari hii, mawinga wa United hawajaonesha makali sana tofauti na misimu kadhaa iliyopita. Baadhi yao wameporomoka viwango hasa Antonio Valencia ambae msimu uliopita ndie alikuwa mchezaji bora wa mwaka wa Manchester United...Ikiwa tayari Man United wameshamnasa Wilfried Zaha katika dirisha dogo la usajili lililopita la mwezi januari, ni wakati sasa wa United kuanza kutumia damu mpya kwenye 'flanks' ili kurejesha zile 'glorious days' kama za enzi ya Cristiano Ronaldo.

Zaidi ya hayo, James Rodriguez amekuwa akitajwa kama ndie Cristiano Ronaldo wa Amerika ya kusini kutokana na uwezo wake mkubwa alionao wa kusakata kabumbu. Pia mwenyewe alifarijika sana pindi aliposikia taarifa za kutakiwa na Manchester United msimu uliopita na baadae kunukuliwa akisema siku moja angependa kuchezea moja ya vilabu vikubwa barani Ulaya na akazitaja timu za Manchester United, Real Madrid na FC Barcelona.

Kwa kumalizia, kama Man United itafanikiwa kumsajili Rodriguez basi bila shaka itakuwa na safu moja kali sana ya ushambuliaji na haitakuwa ikipigania Ubingwa wa EPL pekee bali pia Ubingwa wa FA na Ubingwa wa Ulaya yani ile UEFA Champions League...TUSUBIRI TUONE!